कमजोर कथा

काठमाडौ, फाल्गुन १९ - जिन्दगीको कुनै क्षणमा गरेको अपराधले सधंैभर पीडा दिइरहन सक्छ । राजधानीका १४ हलमा चलिरहेको नेपाली फिल्म 'तहल्का' मा दिलीप रायमाझी यस्तै चरित्रमा देखिन्छन् । सधैं सराकात्मक भूमिका देखिने उनी यसमा आपराधिक समूह तहल्का डटकमको नाइकेका रूपमा छन् ।

एक्सनप्रधान यो फिल्म यही समूहको सेरोफेरोमा घुमेको छ । दिलीप चारजना सम्मिलित तहल्का डटकमको मास्टर माइन्ड हुन् । रातारात धनी हुने सपना पालेका युवाहरू कसरी आपराधिक काममा लाग्छन् र उनीहरूलाई अरूले कसरी षड्यन्त्रमूलक रूपमा प्रयोग गर्छन् भन्ने फिल्ममा देखाउन खोजिएको छ । दिलीपसँगै पुजना प्रधान, धमेन्द्र आचार्य र रोशन श्रेष्ठ यो आपराधिक समूहका पात्रका रूपमा छन् ।

म्युजियममा रहेको हीरा चोरेर धनी बन्ने र यसपछि आफ्नो दाग पखाल्न समाजमा राम्रो काम गर्ने योजना बुनेको यो समूहले सोचेअनुसार हुँदैन । तहल्का डटकमले आपराधिक काम छाडेको थाहा पाएपछि यही समूहको नाममा अर्को समूहले वितण्डा मच्चाउँछ, जसको नेतृत्व खलचरित्र हेमन्त बुढाथोकीले

गर्छ । हेमन्तले नेतृत्व गर्ने समूह र तहल्का डटकमबीचको आपराधिक रहस्य पत्ता लाउने डीएसपी राणाको भूमिकामा रमित ढुंगाना छन् । उनी आफ्नो मिसन पूरा गर्न जागिरलाई समेत दाउमा राख्छन् ।

कथा एकदमै झिनो छ । अपराध, हत्या, आतंक र यसले मच्चाउने वितण्डाकै बीचबाट कथानक अघि बढ्छ । ऋचा घिमिरे र पुजना पनि नकारात्मक भूमिकामै छन्, फरकफरक समूहमा । पुजना तहल्का डटकमलाई सघाउने जासुसी महिलाको भूमिका छिन् भने ऋचा हेमन्तको समूहकी सुटरको भूमिकामा । प्रायः पुजना कम लुगामा देखिएकी छन् भने 'भिज्छुमा पानीमा...' गीतको आइटम डान्समा निकै हट दृश्य दिएकी छन् । तहल्का डटकमको एक सदस्यले प्रयोग गर्ने 'हाम्रो पूर्वतिर' भन्ने थेगो मौलिक लाग्छ, दर्शक हाँस्छन् ।

दीपक परिकोटी निर्देशित 'तहल्का' को अन्तिमतिर आम फिल्ममा झंै सबै अपराधीलाई फन्दामा पारेर रमित 'सुपरहिरो' बन्छन् । एउटा आपराधिक समूहमा केन्दि्रत रहेर कथामा केही नयाँपन दिन खोजे पनि अरू खासै नयाँ छैन । द्वन्द्व निर्देशन अष्ट महर्जनले गरेका छन्, तर सबैजसो फाइट परम्परागत नै लाग्छन् । अर्जुन महर्जन, राजेन्द्रमान श्रेष्ठ र रविन महर्जनले निर्माण गरेको फिल्मको एक्सनमा प्रविधि र सिर्जनशीलताको खासै प्रयोग भएको देखिँदैन । मसला फिल्म रुचाउने दर्शकका लागि भने 'तहलका' ठीकैको ठहरिन सक्छ । साभार: इकान्तिपुर